Le Dit des rues de Paris : Différence entre versions

Ci commence le Dit des rues de Paris.
Maint dit a fait de Roys, de Conte,
Guillot de Paris en son conte;
Les rues de Paris briement
A mis en rime, oiez comment.

La rue de la Huchete à Paris
Premiere, dont pas n'a mespris.
Asés tost trouva Sacalie,
Et la petite Bouclerie,
Et la grant Bouclerie aprés,
Et Hérondale tout en près.
En la rue Pavée alé,
Où a maint visage halé :
La rue a l'Abé Saint-Denis.
Siet^[1] asés près de Saint-Denis,
De la Grant rue Saint-Germain
Des Prez, si fait rue Cauvain
Et puis la rue Saint-Andri.
Dehors mon chemin s'estendi
Jusques en la rue Poupée.
Adonc ai ma voie adrecée,
En la rue de la Barre vins,
Et en la rue à Poitevins,
En la rue de la Serpent,
De ce de riens ne me repent;
En la rue de la Platrière,
La maint^[2] une Dame loudière^[3]
Qui maint chapel a fait de fueille^[4].
Par la rue de Haute feulle
Ving en la rue de Champ-petit;
Et au-desus est un petit
La rue du Puon vraiement.
Je descendi tout belement^[5]
Droit à la rue de Cordeles :
Dames i a, le descort^[6] d'elles
Ne voudroie avoir nullement.
Je m'en alai tout simplement
Diluecques^[7] au Palais de Termes
Où il a celiers et citernes,
En cette rue a mainte Court.
La rue aux hoirs de Harecourt
La rue Pierre Sarrazin,
Où l'en essaie maint roncin^[8]
Chascun an, comment con le hape^[9].
Contre val^[10] rue de le Harpe
Ving en la rue Saint-Sevring,
Et tant fis cau carrefour ving :
La Grant-Rue trouvai briément;
De la entrai premièrement
Trouvai la rue As Escrivains;
De cheminer ne fu pas vains
En la petite ruelete
Saint-Sevrin; mainte meschinnete^[11]
Si louent souvent et menu
Et font batre^[12] le trou velu
Des fesseriaus, qui que nus die.^[13]
En la rue Erembourc de Brie
Alai; et en la rue o Fain;
De cheminer ne fu pas vain.
Une femme vi batre lin
Par la rue Saint-Mathelin.
En l'en Cloistre m'en retourné
Saint-Beneoit le bestourné,
En la rue as hoirs de Sabonnes
A deux portes belles et bonnes^[14].
La rue à l'Abbé de Cligny
Et la rue au Seigneur d'Igny
Sont prés de la rue o Corbel;
Desus siet^[1] la rue o Ponel,
Y la rue a Cordiers aprèz
Qui des Jacopins siet^[1] bien prèz :
Encontre est rue Saint-Estienne;
Que Diex^[15] en sa grâce nous tiengne
Que de s'amour aions mantel.
Lors descendi en Fresmantel,
En la rue de l'Oseroie;
Ne sai comment je desvouroie
Ce conques nul jour ne voué
Ne à Pasques, ne a Noué^[16].
En la rue de l'Ospital
Ving; une femme i despital
Une autre femme folement
De sa parole moult vilment^[17].
La rue de la Chaveterie
Trouvai; n'alai pas chies Marie^[18]
En rue Saint-Syphorien,
Où maingnent^[2] li logipcien^[19].
En prés est la rue du Moine
Et la rue au Duc de Bourgoingne;
Et la rue des Amandiers prèz
Siet^[1] en une autre rue enprèz
Qui a non rue de Savoie.
Guillot de Paris tint sa voie
Droit en la rue Saint-Ylaire,
Où une Dame débonnaire
Maint^[2], con apele Giete das;
En contre est la rue Judas,
Puis la rue du Petit-Four,
Con apelle le Petit-Four;
Saint-Ylaire, et puis Clos-Burniau,
Ou l'en a rosti maint bruliau^[20] :
Et puis la rue du Noier,
Ou pluseurs Dames por louier^[21]
Font souvent batre leur cartiers.^[13]
En prèz est la rue a Plastriers,
Et parmi la rue as Englais
Ving a grant feste et a grant glais^[22].
La rue a Lavendières tost
Trouvai; prèz d'iluec^[7] assez tost
La rue qui est belle et grant
Sainte-Genevieve la grant,
Et la petite ruelete
De quoi l'un des bous chiet^[23] sus l'etre,
Et l'autre bout si se raporte
Droit a la rue de la Porte
De Saint-Marcel; Par Saint-Copin,
En contre est la rue Clopin,
Et puis la rue Traversainne,
Qui siet^[1] en haut bien loins de Sainne.
En prèz est la rue des Murs :
De cheminer ne fut pas mus
Jusqu'à la rue Saint-Vitor,
Ne trouvai ne porc ne butor^[24],
Mes femme qui autre conseille;
Puis truis^[25] la rue de Verseille
Et puis la rue du Bon-Puis;
La maint^[2] la femme a i Chapuis^[26]
Qui de maint home^[27] a fait ses glais^[22][28].
La rue Alexandre Lenglais
Et la Pavée-Goire^[29],
La bui-ge de bon vin de beire.^[29]
Et la rue Saint-Nicolas
Du Chardonnai ne fu pas las.
En la rue de Bièvre vins;^[29]
Ilueques^[7] i petit m'assis.^[29]
D'iluec^[7] en la rue Perdue
Ma voie ne fu pas perdue.
Je m'en reving droit en la place
Maubert, et bien trouvai la trace
D'iluec^[7] en la rue a Trois-Porte
Dont l'une le chemin raporte
Droit a la rue de Gallande,
Ou il n'a ne forest^[30] ne lande,
Et l'autre en la rue d'Aras,
Ou se nourrissent maint grant ras.
En prés est rue de l'Escole,
La demeure Dame Nicole;
En celle rue, ce me samble
Vent-on et fain et fuerre^[31] ensamble,
Puis la rue Saint-Julien
Qui nous gart^[32] de mauvais lien.
M'en reving en la Bucherie
Et puis en la Poissonnerie.
C'est verité que vous despont,
Les rues d'outre-Petit-Pont
Avons nommées toutes par non
Guillot qui de Paris ot nom;
Quatre-vingt par conte en y a,
Certes plus ne mains n'en y a.
En la Cité isnelement^[33]
M'en ving aprés privéement.

La rue du Sablon par m'ame,
Puis rue Neuve Nostre Dame;
En près est la rue a Coulons,
D'iluec^[7] ne fu pas mon Cuer^[34] lons,
La ruele trouvai briement
De Saint-Christofle, et ensement^[35]
La rue du Parvis bien près,
Et la rue du Cloistre après;
Et la Grant-rue Saint-Christofle :
Je vi par le trelis d'un coffre
En la rue Saint-Père a Beus
Oisiaus qui avoient piez beus^[36]
Qui furent pris sus la marinne^[37].
De la rue Sainte-Marine
En la rue Cocatris vins,
Ou l'en boit souvent de bons vins,
Dont maint homs^[27] souvent se varie^[38].
La rue de la Confrarie
Nostre-Dame et en Charoui,
Bonne taverne achiez ovri^[39].
La rue de la Pomme assez tost
Trouvai, et puis aprèz tantost
Ce fu la rue as Oubloiers;
La maint Guillebert a braiés :
Marcé Palu, la Juerie,
Et puis la petite Orberie,
Qui en la Juerie siet^[1];
Et me samble que l'autre chief
Descent droit en la rue a Fèves
Par de ça la maison o Fèvre.
La Kalendre et la Ganterie
Trouvai, et la grant Orberie;
Aprèz, la Grant Bariszerie;
Et puis après, la Draperie
Trouvai et la Chaveterie,
Et la ruele Sainte-Crois
Ou l'en chengle^[40] souvent des cois^[41],^[42]
La rue Gervese Lorens
Ou maintes Dames ygnorens,
Y maingnent qui de leur quiterne^[43];
En près rue de la Lanterne;
En la rue du Marmouset
Trouvai i homme qui mu fet^[44]
Une muse corne bellourde^[45].
Par la rue de la Coulombe
Alai droit o port Saint-Landri;
La demeure Guiart Andri :
Femmes qui vont tout le chevez
Maingnent en rue du Chevés
Saint-Landri est de l'autre part,
La rue de l'Ymage départ^[46]
La ruele, par Saint-Vincent,
En bout de la rue descent
De Glateingni, ou bonne gent
Maingnent, et Dames o corps gent^[47]
Qui aus hommes, si com moi semblent,
Volentiers charnelment assamblent.^[13]
La rue Saint-Denis de la Chartre,
Ou pluseurs Dames en grant chartre
Ont maint vis^[48] en leur con tenu
Comment qu'ils soient contenu.^[13]
En ving en la Peleterie;
Mainte penne i vi esterie.
En la faute du pont m'asis;
Certes il n'a que trente-sis
Rues contables en Cité
Foi que doi Bénédicite.

Par deça Grant-Pont erraument^[49]
M'en ving, sachiez bien vraiement,
N'avoie alenas ne poinson^[50].
Premiere, la rue o Poisson;
La rue de la Saunerie
Trouvai, et la Mesgneiscerie,
L'Escole et rue Saint-Germain
A Couroiers bien vint a main,
Tantost la rue a Lavendières
Ou il a maintes lavendières
La rue a Moignes de Jenvau
Porte à mont^[51] et porte à vau^[52];
En prèz rue Jehan Lointier;
Là ne fu-je pas trop lointier^[53]
De la rue Bertin Porée,
Sanz faire nule eschaufourrée^[54].
Ving en la rue Jehan l'Éveillier;
Là demeure Perriaus Goullier.
La rue Guillaume Porée près
Siet^[1], et Maleparole em près,
Où demeure Jehan Asselin.
Parmi le Perrin Gasselin,
Et parmi la Hérengerie,
M'en ving en la Tableterie,
En la rue à Petis Soulers
De basenne tout fu souilliés
D'esrer^[55] ce ne^[56] mie fortune.
Par la rue Sainte-Oportune
Alai en la Charonnerie
Et puis en la Feronnerie;
Tantost trouvai la Mancherie,
Et puis rue de la Cordoüanerie;
Prèz demeure Henri Bourgaie.
La rue Baudouin Prengaie
Qui de boire n'et pas lanier^[57].
Par la rue Raoul l'Avenier
Alai o siège à Descarcheeurs;
D'iluec^[7] m'en alai tantost ciex^[58]
Un tavernier en la viez place
A Pourciaus; bien trouvai ma trace
Guillot qui point d'eur bon n'as^[59].
Parmi la rue à Bourdonnas
Ving en la rue Thibaut a Dez.
Un hons^[27] trouvai en ribaudez^[60] :
En la rue de Béthisi
Entré, ne fu pas éthisi^[61] :
Assez tost trouvai Tirechape;
N'ai garde que rue m'eschape
Que je ne sache bien nommer,
Par non, sanz nule mesnommer^[62],
Sanz passer guichet ne postis^[63].
En la rue o Quains de Pontis
Fis un chapia^[64] de violete;
La rue o Serf et Gloriete,
Et la rue de l'Arbre Sel
Qui descent sus un biau ruissel^[65],
Trouvai, et puis Col de Bacon,
Ou l'en a trafarcié^[66] maint con.^[13]
Et puis le Fossé Saint-Germain,
Trou Bernart trouvai main à main^[67],
Part ne compaigne^[68] n'atendi;
Mon chemin a val s'estendi,
Par le Saint-Esperit, de rue
Sus la rivière en la Grant Rue
Seigneur de la porte du Louvre ;
Dames y a gentes^[47] et bonnes,
De leur denrées trop sont riche.
Droitement parmi Osteriche
Ving en la rue Saint-Honouré;
La trouvai-ge mestre Huré,
Les lui séant Dames polies.
Parmi la rue des poulies
Ving en la rue Daveron;
Il y demeure un gentis-hon^[27].
Par la rue Jehan Tison
N'avoie talent de proier,
Mès par la Crois de Tiroüer
Ving en la rue de Neele;
N'avoie tabour ne viele :
En la rue Raoul Menuicet
Trouvai un homme qui mucet^[69]
Une femme en terre^[70] et en siet^[1].
La rue des Estuves en près siet^[1].
En près est la rue du Four :
Lors entrai en un carefour,
Trouvai la rue des Escus;
Un homs^[27] a granz ongles locus^[71]
Demanda : Guillot, que fes-tu ?
Droitement de Chastiau Festu
M'en ving à la rue a Prouvoires,
Où il a maintes pennes vaires;
Mon cuer^[34] si a bien ferme veue.
Par la rue de la Croiz Neuve
Ving en la rue Raoul Roissole,
N'avoie ne plais ne sole.
La rue de Monmatre trouvé;
Il est bien seu et prové
Ma voie fut délivre et preste.
Tout droit par la ruelle e Prestre
Ving à la pointe Saint-Huitasse.
Droit et avant sui ma trace
Jusques en la Tonnelerie,
Ne sui pas cil qui trueve lie.
Mais par devant la Halle au blé
Ou l'en a mainte foiz lobé^[72],
M'en ving en la Poisonnerie
Des Halles, et en la Formagerie.
Tantost trouvai la Ganterie,
A l'encontre est la Lingerie;
La rue o Fevre siet^[1] bien près,
Et la Cossonnerie après.
Et por moi miex garder des halles,
Par desouz les avans des halles
Ving en la rue à Prescheeurs,
La bui avec frères meneurs
Dont je n'ai pas chière marie^[18].
Puis alai en la Chanverie,
Asez près trouvai Maudestour,
Et le carrefour de la Tour
Où l'en giète mainte sentence
En la maison à dan Sequence.
Le Puis^[73] le carrefour départ^[46] :
Jehan Pincheclou d'autre part
Demoura tout droit a l'encontre.
Or dirai sanz faire lonc conte :
La Petite Truanderie
Et rues des Halles s'alie;
La rue au Cingne, ce me samble,
Encontre Maudestour assamble
Droit à la Grant Truanderie.
Et Merderiau n'obli-je mie,
Ne la petite ruelete
Jehan Bingne, par Saint-Cler furète,
Mon chemin ne fu pas trop rogue^[74].
En la rue Nicolas Arode
Alai, et puis en Mauconseil;
Une Dame vi sus un seil^[75]
Qui moult se portoit noblement;
Je la saluai simplement,
Et elle moi par Saint Loys !
Par la rue Saint-Denis,
Ving en la rue As Ouës droit,
Pris mon chemin et mon adroit
Droit en la rue Saint-Martin,
Où j'oï chanter en latin
De Nostre Dame un si dous chans.
Par la rue des Petis Chans
Alai droitement en Biaubourc,
Ne chassoie chièvre ne bouc^[76] :
Puis truis^[25] la rue a Jongleeurs
Con ne me tiengne à jengleeurs^[77].
De la rue Gieffroi l'Angevin
En la rue des Estuves vin,
Et en la rue Lingarière,
Là où l'en a mainte plastrière
D'archal mise en œuvre pour voir
Pluseurs gens pour leur vie avoir;
Et puis la rue Sendebours
La Tréfilliére a l'un des bous,
Et Quiquenpoit que j'ai moult chier^[78];
La rue Auberi le Bouchier,
Et puis la Conreerie aussi,
La rue Amauri de Roussi,
En contre Trousse-Vache chiet.
Que Diex^[15] gart^[32] qu'il ne nous meschiet^[79].
Et la rue du Vin-le-Roy
Dieu grâce ou n'a point de desroy,
En la Viez-Monnoie par sens
M'en ving aussi con par à sens.
Au desus d'iluec^[7] un petit
Trouvai le Grant et le Petit
Marivaux, si comme il me samble
Li uns à l'autre bien s'asamble;
Au desous siet^[1] la Hiaumerie,
Et ases près la Lormerie,
Et parmi la Basennerie,
Ving en la rue Jehan le Conte.
La Savonnerie en mon conte
Ai mise : par la Pierre o Let
Ving en la rue Jehan Pain Molet,
Puis truis^[25] la rue des Arsis;
Sus un siege un petit m'assis
Pour ce que le repos fu bon;
Puis truis^[25] les deux rues Saint Bon.
Lors ving en la Buffeterie,
Tantost trouvai la Lamperie,
Et puis la rue de la Porte
Saint-Mesri : mon chemin s'aporte
Droit en la rue a Bouvetins.
Par la rue a Chavetiers tins
Ma voie en rue de l'Estable
Du Cloistre, qui est honestable^[80]
De saint Mesri, en Baillehoe,
Où je trouvai plenté^[81] de boé^[82],
Et une rue de renon,
Rue neuve Saint-Mesri a non.
Tantost trouvai la Court Robert
De Paris; mes par Saint Lambert !
Rue Pierre o Lart siet^[1] près,
Et puis la Bouclerie après :
Ne la rue n'oublige pas
Symon le Franc. Mon petit pas
Alai vers la Porte du Temple
Pensis ma main de lez ma temple.
En la rue des Blans Mantiaus
Entrai, où je vis mainte piaus
Metre en conroi, et blanche et noire;
Puis truis^[25] la rue Perrenele
De Saint-Pol, la rue du Plastre,
Où maintes Dames leur emplastre^[83]
A maint compaignon ont fait batre
Ce me samble pour eulz esbatre.^[13]
En près est la rue du Puis.
La rue à Singes après pris;
Contre val^[10] la Bretonnerie,
M'en ving plain de mirencolie^[84];
Trouvai la rue des Jardins,
Où les Juys maintrent^[2] jadis;
O carrefour du Temple vins,
Où je bui plain henap^[85] de vin
Pour ce que moult grant soif avoie.
Adonc me remis à la voie,
La rue de l'Abbéïe du Bec
Helouin trouvai par abec^[86];
M'en alai en la Verrerie,
Tout contre val^[10] la Poterie.
Ving o carefour Guillori,
Li un dit ho, l'autre hari,
Ne perdi pas mon essien^[87].
La ruelete Gencien
Alai, ou maint^[2] un biau^[88] varlet^[89],
Et puis la rue Andri Mallet,
Trouvai la rue du Martrai;
En une ruele tournai
Qui de Saint-Jehan voie a porte^[90]
En contre la rue à Deux Portes :
De la Viez Tiesseranderie
Alai droit en l'Esculerie,
Et en la rue de Chartron,
Où mainte dame en chartre ont
Tenu maint vit, pour se norier^[91].^[13]
En la rue du Franc-Monrier
Alai, et Vuiez Cimetière
Saint-Jehan meisme en cetière.
Trouvai tost la rue du Bours
Tibout, et droit a l'un des bous
La rue Anquetil-le-Faucheur;
La maint^[2] un compains tencheeur.
En la rue du Temple alai
Isnelement^[33] sanz nul délai :
En la rue au Roy-de-Sézille
Entrai; Tantost trouvai Sedile,
En la rue Renaut-le-Fèvre
Maint^[2], ou el vent et pois et fèves.
En la rue de Pute-y-Muce,
M'en entrai en la maison Luce
Qui maint^[2] en rue de tyron,
Des Dames ymes^[92] vous diron.
La rue de l'Escouffle est près,
Et la rue des Rosiers près :
Et la Grant-rue de la Porte
Baudeer, si con se comporte,
M'en alai en rue Percié;
Une femme vi destrecié^[93]
Pour soi pignier^[94] qui me donna
De bon vin. Ma voie adonna
En la rue des Poulies-Saint-Pou,
Et au-desus d'iluec^[7] un pou^[95]
Trouvai la rue à Fauconniers
Où l'en trueve bien por deniers,
Femmes por son cors soulacier^[96].^[13]
Parmi la rue du figuier,
Et parmi la rue à Nonnains
D'Iere, vi chevaucher deux nains
Qui moult estaient esjoï^[97].
Puis truis^[25] la rue de Joy,
Et la rue Forgier l'Anier.^[98]
Je ving en la Mortelerie,
Où a mainte tainturerie.
La rue Ermeline-Boiliaue,
La rue Garnier desus l'Yaue
Trouvai, à ce mon cuer^[34] s'atyre :
Puis la rue du Cimetire
Saint-Gervais, et puis l'Ourmeciau,
Sanz passer fosse ne ruissiau,
Ne sanz passer planche ne pont,
La rue a Moines-de-Lonc-Pont
Trouvai, et rue Saint-Jehan
De Grève, ou demeure Jouan,
Un homs^[27] qui n'a pas veue saine.
Prés de la ruele de Saine,
En la rue Sus la Rivière,
Trouvai une fausse estrivière^[99];
Si m'en reving tout droit en Grève,
Le chemin de riens ne me grève;
Tantost trouvai la Tanerie,
Et puis après la Vanerie,
La rue de la Coifferie,
Et puis après la Tacherie,
Et la rue aus Commanderesses,
Où il a maintes tencheresses^[100]
Qui ont maint homme pris o brai^[101].
Par le Carefour de Mibrai,
En la rue Saint-Jacque et ou Porce
M'en ving, n'avoie sac ne poce;
Puis alai en la Boucherie,
La rue de l'Escorcherie
Tournai, parmi la Triperie
M'en ving en la Poulaillerie,
Car c'est la derrenière rue
Et si siet^[1] droit sus la Grant-Rue.
Guillot si fait à tous savoir,
Que par deça Grant Pont pour voir
N'a que deus cent rues mains sis;
Et en la Cité trente sis,
Outre Petit-Pont quatre vingt,
Ce sont dis mains de seize vingt,
Dedenz les murs non pas dehors.
Les autres rues ai mis hors
De sa rime, puisqu'il n'ont chief.
Ci vont faire de son Dit chief
Guillot, qui a fait maint biaus dis,
Dit qu'il n'a que trois cent et dis
Rues à Paris vraiement.
Le dous Seigneur du firmament
Et sa très douce chiere mère
Nous deffende de mort amere.

Explicit le Dit des Rues de Paris